Die Raad van die Universiteit Stellenbosch (US) het by sy kwartaallikse vergadering vandeesweek met waardering kennis geneem van die afsluitingsverslag van die Komitee in Reaksie op die Aanbevelings van die Khampepe-kommissie (CIRCoRe). Die verslag is deur die Tegniese Komitee vir die Sluiting van CIRCoRe (TCC) opgestel. Die voormalige hoofde van die CIRCoRe-werkstrome het in die TCC gedien, naamlik proff Ronelle Carolissen en Kopano Ratele, en drr Leslie van Rooi, Phila Msimang en Sharman Wickham saam met mnr Mohamed Shaikh, projekko?rdineerder van CIRCoRe. Prof André Keet, Viserektor: Betrokkenheid en Transformasie aan die Nelson Mandela Universiteit, het deurgaans as eksterne adviseur vir die CIRCoRe-proses gedien.
Volgens prof Nico Koopman, voorsitter van die TCC en Viserektor: Sosiale Impak, Transformasie en Personeel, was die US Raad vol lof vir die werk wat tot die finale CIRCoRe-hoofstuk gelei het. "Die Raad het 'n mosie van dank en waardering aanvaar vir die werk van soveel kollegas en studente wat by die CIRCoRe-proses betrokke was, asook die tegniese komitee wat vir die afsluiting van die CIRCoRe-proses verantwoordelik was."
Hy sê die verslag verskaf 'n magdom materiaal waarmee daar vorentoe beweeg kan word. "CIRCoRe het onder moeilike omstandighede gewerk en ons het 'n mate van onstuimigheid langs die pad ondervind, maar die feit dat die betrokkenes saamgespan het om 'n verslag te finaliseer, spreek van hulle verbintenis tot die instelling en tot die transformasie van die Universiteit."
Die CIRCoRe-aanbevelings en -voorstelle sal nou aan die betrokke akademiese en professionele administratiewe steundienste (PASD)-omgewings gedelegeer word vir oorweging en vir die opstel van toepaslike implementeringsplanne – onder leiding van Koopman, ondersteun deur die US se Institusionele Transformasiekomitee (ITK). In die toekoms sal die Visekanselier en Rektor, prof Deresh Ramjugernath, as voorsitter van die ITK dien om uitdrukking te gee aan die bre?r institusionele verbintenis tot transformasie.
Die Universiteit het vandeesweek 'n oorsig van CIRCoRe se werk, sy aanbevelings en die impak daarvan op die Universiteit se transformasiepogings tot dusver, uitgegee om saam te val met die afsluitingsverslag aan die Raad. [Lees die digitale tydskrif]
Die US het met die totstandkoming van CIRCoRe in April 2023 'n gevorderde transformasiereis begin. Hierdie komitee was eerstens vir die verwerking van die Khampepe-verslag (wat in Oktober 2022 verskyn het) verantwoordelik, en tweedens om die institusionele reaksieproses op die verslag te lei, te ko?rdineer en te bestuur.
CIRCoRE het deur middel van sy vyf werkstrome, naamlik studentelewe/gemeenskappe; kurrikulum; institusionele kultuur; ras, menslike kategorisering en wetenskap; en strategiese organisatoriese belyning, voorstelle vir oorweging en implementering deur die Rektoraat ontwikkel.
Personeel en studente word uitgenooi om die interaktiewe tydskrif, wat lig op CIRCoRe se werk as 'n waterskeidingshoofstuk in die US se transformasiereis werp, aktief te lees.
- Lees die volledige artikel in die tydskrif op die CIRCoRe-webwerf.
- Lees die CIRCoRe-afsluitingsverslag hier.?
